Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre ayaa magacaabay guddi wasiirro iyo masuuliyiin kale isugu jirta oo ka shaqeenaya u diyaar garowga xuska maalmaha xuriyada.
Qoraal uu soo saaray Ra’isul Wasaaraha ayuu ku sheegay in iyada oo la garowsanayo qiimaha iyo mudnaanta ay leedahay sanad guurada 63—aad ee Gobannimada, Midnimada iyo dhalashadii Jamhuuriyadda Soomaaliya uu magacaabay guddi qaban qaabo.
Guddigan uu magacaabay Ra’isul Wasaaraha ayaa isugu jira sideed wasiir iyo guddoomiyaha gobolka Banaadir, waxaana guddigan guddoomiye looga dhigay wasiirka arrimaha gudaha Soomaaliya.
Dowladda Soomaaliya ayaa sannad kasta sameysa munaasabado waa weyn oo lagu xusayo maalmaha xuriyadda dalka gaar ahaan 26-ka Juun iyo 1-Luulyo oo ah maalmihii ay xuriyada qaateen sidoo kale midoobeen gobolada Waqooyi iyo Koonfureed.
